Jun 18, 2013

ભાગવત રહસ્ય -૩૨૯

ડોંગરેજી મહારાજ ની કથા પર આધારિત
      PREVIOUS PAGE
     NEXT PAGE
સ્કંધ-૧૦ (પૂર્વાર્ધ)-૫૨

ત્રીજી ગોપી કહે છે-કે-મા તમને હું શું કહું ? આજે દૂધ-દહીં ગોળીમાં ભરીને વેચવા જતી હતી.
ત્યારે રસ્તામાં મને થયું કે મારી ગોળીમાં કનૈયો છે.મે ગોળી નીચે ઉતારીને જોયું તો ગોળીમાં મને લાલો દેખાણો.કનૈયો મને કહે -કે તારી ગોળીમાં રહેવું મને બહુ ગમે છે,ગોપી,તું મને વેચીશ નહિ.
મને વિચાર થયો કે મારે કનૈયા ને વેચવો નથી,એણે હું મારે ઘેર લઇ જઈશ.
હું તો તન્મયતામાં ઘેર આવી અને મારી ફજેતી થઇ.મા,જ્યાં જોઈ એ ત્યાં મને કનૈયો દેખાય છે.

આ બુદ્ધિ-રૂપી ગોળી માં જો કનૈયો હશે તો તેને સર્વ જગ્યાએ કનૈયો દેખાશે.
બુદ્ધિ માં પરમાત્મા આવે તો તેને પરમાત્મા નો અનુભવ થાય છે. ગોપીઓ બુદ્ધિમાં ઠાકોરજી ને રાખે છે.

ગોપી ભલે ઘરમાં છે,પણ તેના મન માં ઘર નથી, ગોપીના મન માં શ્રીકૃષ્ણ છે.
ગોપીઓ ના છુટકે ઘરનું કામ કરે છે,પણ શ્રીકૃષ્ણ ને સદા યાદ કરે છે.અને શ્રીકૃષ્ણ નું સ્મરણ કરે છે.

વ્યવહાર એટલો જ રાખવો જોઈએ કે જે કર્યા વગર છૂટકો ના હોય.વ્યવહાર અને ભક્તિ ને વિરોધ છે.
ગોપીઓ ના પ્રેમ સંન્યાસ ની આ કથા છે.ગોપીઓ નાં કપડાં ભગવાં નથી પણ મન કૃષ્ણપ્રેમ માં રંગાયેલું છે. ગોપીઓ ઘરમાં રહે છે પણ તેમનું જીવન સન્યાસી જેવું છે.

ગોપીઓ નું મન કનૈયા ની લીલાઓ જોઈ તન્મય,અસ્થિર બની જતું.
શ્રીકૃષ્ણ સાથે તન્મયતાને કારણે,વ્યવહારનાં કામ બરોબર કરી શકતી નહોતી.
શુકદેવજી સન્યાસી,પરમહંસ છે,અને ગોપીઓ ની કથા કરે છે. ગોપીઓ પણ પરમહંસ છે.

બધા કાર્ય થી પરવારી,મળેલા સમયમાં ભક્તિ કરવી, તે મર્યાદા ભક્તિ.
મર્યાદા ભક્તિમાં વ્યવહાર અને ભક્તિ જુદાં હોય છે,પણ પુષ્ટિ ભક્તિ માં તેવું નથી.
તેમાં વ્યવહાર અને ભક્તિ બંને એક જ છે.દરેક કાર્ય માં ઈશ્વરનું અનુસંધાન તે પુષ્ટિ ભક્તિ.

ગોપીઓ નો દરેક કાર્યમાં ઈશ્વરનું અનુસંધાન રાખે છે,આ સિદ્ધાંત આચાર્ય મહાપ્રભુજીએ આગળ ચલાવ્યો છે.
મહાપ્રભુજીએ સુબોધિનીજી માં ગોપીઓ ને પ્રેમ સન્યાસીઓ કહી છે.ગોપીઓ પાસે હતો –કેવળ નિસ્વાર્થ પ્રેમ.
વસ્ત્રસંન્યાસ કરતા પ્રેમસંન્યાસ ઉત્તમ છે.પ્રભુપ્રેમ ના રંગથી મન રંગાય એ સાચો સંન્યાસ.
અંદરથી થી ભક્તિ નો રંગ લાગવો જોઈએ.કૃષ્ણ-પ્રેમ માં હૃદય પીગળે અને અંદર સંન્યાસ આવે તો-
સંન્યાસ દીપે. સર્વ કર્મનો ન્યાસ-ત્યાગ એટલે સંન્યાસ.ઈશ્વરને માટે જીવે તે સન્યાસી.
ગોપીઓ માત્ર ઈશ્વર માટે જ જીવતી હતી.એટલે ગોપીઓ ને ઉપમા આપી છે-પ્રેમ સંન્યાસીનીઓ ની.

જ્ઞાન અને યોગ પર ભક્તિ નો આ વિજય બતાવ્યો છે.
આગળ આવશે કે ભક્તિ ભગવાન ને બાંધે છે.એટલે કે ભગવાન ને વશ કરે છે.

આ મન માખણ જેવું મૃદુ છે.મન ની ચોરી એ જ માખણ ચોરી છે.
કનૈયો  બધાનાં મન ચોરે છે,પણ પકડાતો નથી. ચોરી કરીને પકડાય તે સામાન્ય ચોર.
પણ આ તો અનોખો ચોર છે,અનોખો જાદુગર છે. તે ગોપીઓ ના મન નો તે નિરોધ કરે છે.(ચોરે છે)
જેથી કોઈ પણ ઇન્દ્રિયો ના વિષયોમાં તેનું મન ના જાય.

બીજી રીતે જોઈએ તો, જો એક એક ગોપી તે ઇન્દ્રિય છે, તો સર્વ ઇન્દ્રિયો (ગોપીઓ) ઈશ્વર નું
ચિંતન કરે ,તે ઉદ્દેશથી,આ બધી લીલાઓ છે.

ડોંગરેજી મહારાજ ની કથા પર આધારિત
      PREVIOUS PAGE
     NEXT PAGE
   INDEX PAGE