II संजय उवाच II कर्णोपि शरजालेन केकयानां महारथान I व्यधमत् परमेष्वासानग्रतः पर्यवस्थितान् II १ II
સંજય બોલ્યો-ત્યારે કર્ણ પણ મોખરામાં આવી ઉભેલા કેકયોના મહાધનુર્ધરોનો નાશ કરવા લાગ્યો ને પાંચસો મહારથીઓને યમલોકમાં મોકલી દીધા.કર્ણનાં બાણોથી પીડાયેલા તે યોદ્ધાઓ 'યુદ્ધમાં આ કર્ણને સહન કરવો અશક્ય છે' એમ માનીને ભીમસેન પાસે દોડી ગયા.આ રીતે રથસૈન્યમાં ભંગાણ પાડીને કર્ણ એકલો જ યુધિષ્ઠિર સામે ધસી ગયો.તે સમયે યુધિષ્ઠિર ઘાયલ થઈને લગભગ બેભાન જેવા થઇ ગયા હતા તેથી નકુલ અને સહદેવ સાથે પોતાની છાવણી તરફ જતા હતા.
તે વખતે કર્ણે યુધિષ્ઠિર અને નકુલ સહદેવ પર પ્રહારો કર્યા.
II संजय उवाच II ततः श्वेताश्वसंयुक्ते नारायणसमहिते I तिष्ठन रथवरे श्रीमानर्जुनः समपद्यत II १ II
સંજય બોલ્યો-તે પછી,ધોળા રંગના ઘોડાઓ જેમાં જોડેલા હતા અને શ્રીનારાયણ જેને હાંકતા હતા,તેવો મહાન રથ તમારા સૈન્યમાં આવી પહોંચ્યો.જેમ,વાયુ મહાસાગરને ખળભળાવી મૂકે તેમ,અર્જુને તમારા સૈન્યને ખળભળાવી મૂક્યું.ત્યારે દુર્યોધન,અર્ધા સૈન્યથી વીંટાઇને એકાએક ચઢી આવ્યો,ને સામેથી ચઢી આવતા યુધિષ્ઠિરને રોકીને તેમના પર તોંતેર ક્ષુરપ્ર બાણો મૂકીને વીંધી નાખ્યા.તે વખતે કૌરવપક્ષના યોદ્ધાઓ યુધિષ્ઠિરને કેદ પકડવા માટે દોડ્યા,પણ તેમનો એ અભિપ્રાય જાણી લઈ,નકુલ,સહદેવ અને ધૃષ્ટદ્યુમ્ન,યુધિષ્ઠિરનું રક્ષણ કરવા ત્રણ અક્ષૌહિણી સેના સાથે લઇ ત્યાં દોડી આવ્યા.વળી,ભીમસેન પણ તમારા મહારથીઓને રગદોળતો ત્યાં દોડી આવ્યો.એ સર્વ યોદ્ધાઓને આવેલા જોઈને કર્ણ તેમના પર બાણવૃષ્ટિ કરીને તેમને અટકાવવા લાગ્યો.પાંડવસૈન્યે ઘણો પ્રયત્ન કર્યો પણ તેઓ આગળ વધી શક્યા નહોતા.