Aug 12, 2013

ભાગવત રહસ્ય -૩૮૪

ડોંગરેજી મહારાજ ની કથા પર આધારિત
      PREVIOUS PAGE
     NEXT PAGE
સ્કંધ-૧૦  (પૂર્વાર્ધ)-૧૦૭

શ્રીકૃષ્ણે જેવી ગોવર્ધનનાથ ને પ્રાર્થના કરી –તે જ સમયે ગિરિરાજમાંથી ખળખળ કરતાં ગંગાજી પ્રગટ થયાં છે.(ગિરિરાજ ની પરિક્રમા માં માનસી ગંગા આવે છે) ગોપબાળકો બોલવા લાગ્યાં “કનૈયા આ તો નદી નીકળે છે.”

કનૈયો સમજાવે છે કે-આ સામાન્ય નદી નથી.આ તો ગંગાજી છે.
ગોવર્ધનનાથ નો અભિષેક થયો છે.અભિષેકમાં ધારાનું ખંડન ના થવું જોઈએ.
ખંડન થાય તો અભિષેક માં ભંગ થાય છે.તેમ ઠાકોરજી ની પૂજા માં પણ સાવધાન રહેવાનું છે,
મન ની ધારા ખંડિત ના થાય.મન ઠાકોરજી થી દૂર ના જાય.

તે પછી કનૈયો ગોવર્ધનનાથ નો શૃંગાર કરે છે.શ્રીકૃષ્ણ પોતે જ (પોતાનો) ગોવર્ધનનાથનો શૃંગાર કરે,
તો પછી તે શૃંગાર માં શું બાકી રહે ?
જરા વિચાર કરવામાં આવે તો...મોર ના પીંછા નું કે સુંદર ફૂલો નું ચિતરામણ કરી નિર્માણ કોણ કરે છે ?
ચિત્રકાર કદાચ ચીતરી શકે પણ તેનું નિર્માણ કરી શકે ?
માત્ર પરમાત્મા માં જ દિવ્ય શક્તિ છે.કે જે જાત ભાતના રંગો ભરી "પૃથ્વી" નો શૃંગાર કરે છે.!!!
વ્રજવાસીઓ અને ગોપબાળકો કહે છે-કે લાલા,તારો ઠાકોર ગાલમાં ધીમું ધીમું હસે છે.
અભિષેક ના દર્શન માં સર્વ ને ઘણો આનંદ આવે છે.

વ્રજવાસીઓ તે પછી ચંદન ની અર્ચા લાવ્યા છે.કનૈયો કહે છે-કે-આ શિયાળા નો દિવસ છે,બહુ ઠંડી છે,
ચંદન ની અર્ચ કરો તો મારા ભગવાન ને શરદી થઇ જશે.મારા ભગવાન ને પરિશ્રમ થશે.
ગોપબાળકો કહે છે કે-તો કંકુ નું તિલક કરીએ તો ? ત્યારે કનૈયો કહે છે કે- હા,કંકુ નું તિલક ચાલશે,
પણ બધા ધ્યાન રાખી ને તિલક કરજો,નાકમાં કંકુ જાય તો,મારા ઠાકોરજી ને છીંક આવે.
નંદબાબા પૂછે છે કે-લાલા તારા ઠાકોરજી ને છીંક પણ આવે છે ?

શ્રીકૃષ્ણ કહે છે કે -કેમ નહિ? બાબા,આપણે થોડા પહાડ ની પૂજા કરવા આવ્યા છીએ ? બાબા આ પહાડ નથી,પણ પ્રત્યક્ષ પરમાત્મા છે.(જડ માં પણ ચેતનતા ની ભાવના કરવાની છે)

પરમાત્મા ની મૂર્તિ ની સેવા કરીએ ત્યારે,તે માત્ર જડ મૂર્તિ છે તેવું માનવાનું નથી.
ભગવાન આરોગતા નથી એમ માની ભગવાન ને ભોગ ના ધરાવો,તો ભગવાન ક્યાંથી ભોગ આરોગે ?
પોતાના દેહ માં પ્રેમ રાખીએ છીએ તેવો જ પ્રેમ ભગવાન ની મૂર્તિ માં રાખવો જોઈએ.
સેવા કરનાર પોતાના સુખ નો વિચાર કરે તો તેનાથી સેવા થઇ શક્તિ નથી. આત્મસુખ નો ભોગ આપે ત્યારે સેવા થાય છે.પોતાના શરીર ના બહુ લાડ કર્યા વગર શરીર નો કસ કાઢે તો ત્યારે,સેવા થાય છે.

બાકી તો ઘણા ને પોતાને ગુલાબજાંબુ ખાવા નું મન થાય તો તે ગુલાબજાંબુ બનાવડાવી ને –
ઠાકોરજી આગળ બે સેકંડ  મૂકી-પોતે તે ગુલાબજાંબુ આરોગી જાય છે.
સાચે તો-ઠાકોરજી ને પૂછવાનું છે -કે-પ્રભુ આજે આપને શું ખાવાની ઈચ્છા છે ?

લાલાએ આજે ગમ્મત કરી છે, એક સ્વરૂપ રાખ્યું છે નંદ બાબા પાસે અને પોતે જ ગિરિરાજ ની પૂજા કરે છે,
જયારે બીજા એક સ્વરૂપે ગિરિરાજ માં પ્રવેશ કર્યો છે.
વ્રજવાસીઓ,ગોપબાળકો અને નંદ બાબા એકસાથે બોલી ઉઠયા કે-
લાલા,આ ગિરિરાજ તો શ્વાસ લે છે અને બહાર કાઢે છે.લાલા,ગોર્વર્ધનનાથ તો ચેતન છે,જડ નથી.

ડોંગરેજી મહારાજ ની કથા પર આધારિત
      PREVIOUS PAGE
     NEXT PAGE
   INDEX PAGE