Aug 1, 2014

Gujarati-Ramayan-Rahasya--ગુજરાતી-રામાયણ-રહસ્ય-૨૧૨-ઉત્તરકાંડ


ઉત્તરકાંડ

તીર્થરાજ પ્રયાગમાં શ્રીરામે,હનુમાનજી ને આજ્ઞા કરી કે-બ્રાહ્મણનું રૂપ લઇ તમે અયોધ્યા જાઓ,અને નંદીગ્રામ માં ભરતજી ને અમારા કુશળ સમાચાર અને આગમન ના સમાચાર કહી વહેલા પાછા આવો.
પવન-પુત્ર હનુમાન તરત જ આકાશમાર્ગે ઉપડ્યા.ને ઘડીક માં તો નંદીગ્રામ પહોંચી ગયા.

હનુમાનજીએ બ્રાહ્મણ સ્વરૂપ લીધું છે,ને જુએ છે તો-વલ્કલ અને જટાધારી ભરતજી,દર્ભાસન પર બેસી,
દીનભાવે શ્રીરામચન્દ્રજી ની પાદુકાઓ નું પૂજન કરતા હતા,તેમના મુખમાંથી અખંડ રામ-નામ નો ધ્વનિ નીકળતો હતો.અને આંખમાંથી અશ્રુઓનો પ્રવાહ વહેતો હતો.

ભરતજી ની રામ-ભક્તિ જોઈ ને હનુમાનજી વિહ્વળ થયા,અને તેમની આંખમાંથી પણ આંસુ વહેવા લાગ્યા.
રામ-ભક્તિ અને રામ-ભક્ત એ હનુમાનજી ને સહુથી વહાલી વસ્તુ છે,તે એકદમ ભરતજી ના ચરણમાં પડી ગયા,અને કહેવા લાગ્યા કે-જેના વિરહમાં આપ રાત-દિવસ શોક કરો છો તે,
શ્રીરામજી,સીતાજી અને લક્ષ્મણજી સહિત,આવતી કાલે અહીં પધારે છે,તેઓ અતિ ક્ષેમ-કુશળ છે.

આ શબ્દો સાંભળતાં જ,તરસ્યા ને જેમ અમૃત મળે અને તૃષાનું દુઃખ ભૂલી જાય તેમ,
ભરતજી,બધું દુઃખ ભૂલી ગયા,તેમની આંખોમાંથી હર્ષ ના આંસુ વહી ચાલ્યાં.ઉભા થઇ તે એકદમ
હનુમાનજી ને ભેટી પડ્યા ને બોલ્યા-મને ફરી કહે,તુ મને ફરી કહે કે –શ્રીરામ ક્યારે પધારે છે?
હનુમાનજી કહે છે કે-શ્રીરામ આવતીકાલે વિમાનમાં અહીં પધારશે.આજે ભારદ્વાજ મુનિના આશ્રમ માં છે.

ભરતજી ને હજુ વિશ્વાસ ના થતો  હોય તેમ ફરી ફરી હનુમાનજી ને તેનો તે જ પ્રશ્ન પૂછે છે.અને
હનુમાનજીને છેવટે કહે છે કે-તું કોણ છે? મને ફરીથી કહે કે શ્રીરામ મને યાદ કરે છે?
હનુમાનજી કહે છે કે-હું તો રામજી નો દાસ છું.
અને “હું રામજી નો દાસ છું” એમ સાંભળતા જ ભરતજી આવેશમાં આવી ફરી હનુમાનજી ને ભેટી પડ્યા.
ત્યારે હનુમાનજી એ પોતાનું અસલ રૂપ ધારણ કર્યું,ને પોતાની અસલી ઓળખાણ આપી.અને કહે છે કે-
પ્રભુ, આપ શ્રીરામને પ્રાણ સમાન પ્રિય છો,હે,તાત,મારું આ વચન બિલકુલ સત્ય છે.

ભરતજી ના આનંદનો પાર રહ્યો નથી,તેમણે કહ્યું કે-હે,હનુમાન,તમારાં દર્શનથી મારાં બધાં દુઃખ મટી ગયાં,તમને મળ્યાથી મને હું શ્રીરામને મળ્યો હોઉં,તેટલો આનંદ થાય છે.
ને પછી તો ભરતજી અને હનુમાનજી શ્રીરામની વાતો કરવામાં મશગૂલ થયા,
ભરતજી ફરીફરી શ્રીરામના સમાચાર પૂછે છે ને હનુમાનજી ફરીફરી શ્રીરામના સમાચાર કહે છે.
નથી શ્રોતા ને એકની એક વાત સાંભળવામાં કંટાળો કે નથી વક્તાને કહેવામાં કંટાળો.

દુનિયામાં આવા શ્રોતા અને વક્તા મળવા મુશ્કેલ છે,
કહેવાય છે કે-હનુમાનજી તો આજે પણ પૃથ્વી પર રોજ રામકથા સાંભળતાં વિચરે છે ને રોજ
લાખવાર રામકથા સાંભળવા છતાં તેમણે એનો થાક નથી.”રામ” એ શબ્દ ઉચ્ચારતાં ની સાથે,
એમને તો આખી રામકથા સંભળાઈ જાય છે તેવા,તે રામકથા સાથે એકાકાર છે.

હનુમાનજી એવા અદભૂત શ્રોતા છે,વળી,એમને બોલવા બહુ ઓછું જોઈએ,તેવા,હનુમાનજી ની આજે
ભરતજી સામે જીભ ખુલી ગઈ છે,અને વક્તા થઇ ને બેઠા છે,રામજી ની કથા કહેતાં,એમની આંખોમાંથી
અશ્રુઓ નો પ્રવાહ વહ્યે જાય છે,ને શ્રોતા બનેલા ભરતજીની આંખોમાંથી પણ અશ્રુ-પ્રવાહ ચાલે છે.
ભરતજી વારવાર હનુમાનજી ને ભેટે છે,તેમના હૃદય નો આનંદ સમાતો નથી.

આમ ઘણી ઘણી વાતો થઇ,ને છેવટે ભરતજી ની રજા લઈને હનુમાનજી શ્રીરામ પાસે પહોંચી ગયા.



PREVIOUS PAGE         INDEX PAGE           NEXT PAGE