Jun 2, 2013

ભાગવત રહસ્ય -૩૧૫

ડોંગરેજી મહારાજ ની કથા પર આધારિત
      PREVIOUS PAGE
     NEXT PAGE
સ્કંધ-૧૦ (પૂર્વાર્ધ)-૩૮

એક દિવસ યશોદાજી- લાલા ને ખોળામાં બેસાડી ને રમાડતાં હતા.
ત્યારે તૃણાવર્ત દૈત્ય ને મારવા કૃષ્ણ ભારે બન્યા. યશોદાજી ને વજન લાગવા માંડ્યું એટલે –
કૃષ્ણ ને ત્યાં મૂકી ને ઘરકામ માં લાગ્યા.
તે વખતે તૃણાવર્ત વંટોળિયા નું રૂપ લઇ ને આવ્યો અને શ્રીકૃષ્ણ નું હરણ કરી આકાશમાં ગયો.
શ્રીકૃષ્ણ ત્યારે વધુ ને વધુ ભારે બન્યા અને-તેને પછાડ્યો.એટલે તેના પ્રાણ ઉડી ગયા.
તૃણાવર્ત એ રજોગુણ નું સ્વરૂપ છે, રજોગુણ મન ને ચંચળ બનાવે છે.

સમય ની સાથે-શ્રીકૃષ્ણ હવે ધીરે ધીરે મોટા થયા છે.ઘૂંટણીએ ચાલતા ગૌશાળા માં આવે છે.
ગાયો કનૈયા ને ઓળખતી,મોટા મોટા ઋષિઓ ગોકુલ માં ગાયો થઈને આવ્યા છે.
એક ગાય નો તાજો જન્મેલો વાછરડો આંખ બંધ કરી સ્થિતપ્રજ્ઞ ની જેમ બેઠો છે,બહુ સુંદર લાગે છે.
નાનકડો છે,એટલે લાલાજી એમ સમજે છે કે આ તો મારો ભાઈબંધ છે.એટલે તેના ગળામાં હાથ નાખ્યો,
પ્રેમ થી તેને મળે છે,પણ વાછરડો અચાનક નવા વ્યક્તિ ના આગમન થી ગભરાણો.
અને હમ્મા-હમ્મા કરવા લાગ્યો, ત્યારે કૃષ્ણ મૈયા-મૈયા કરે છે.પણ વાછરડાને છોડતા નથી.

ગાય આનંદ માં વાછરડાને ભૂલી જાય છે અને વહાલ થી કનૈયા ને ચાટે છે.
યશોદાજી ને ખાતરી થઇ કે-ગાયો ની સેવા કરવાને કારણે જ-ગાયો ની આશિષ થી મારે ત્યાં દીકરો થયો છે.
કનૈયો ગાયો સાથે રમે છે, ચાલણગાડી તો મળે નહિ એટલે ગાય નું પૂંછડું પકડી ને જ કનૈયો ઉભો થવા જાય છે. ત્યારે મા કહે છે-કે કનૈયા તું બહુ તોફાન કરે છે,લાલા,આ ગાયો તને મારશે.
અને લાલાનું હુલામણું નામ પડ્યું છે-વત્સપુચ્છાવલમ્બનમ....!!!

એક વખત યશોદાજી, લાલા ને સ્તનપાન  કરાવી રહ્યાં હતાં અને લાલા નું મુખ નિહાળી રહ્યાં હતાં.
મા નો પ્રેમ હોય એટલે લાલાજી વધુ વખત સ્તનપાન કરે,તો મા ને ઘણી વખત ચિંતા થાય કે –
મારા લાલા ને અપચો ના થાય.
લાલાજી કહે છે-કે-મા તારું દૂધ હું એકલો પીતો નથી,મારા મુખ માં રહેલું સમસ્ત વિશ્વ તેનું પાન કરે છે.
તેવા માં કનૈયા એ બગાસું ખાધું,અને યશોદાજી ને લાલા ના મુખમાં સમસ્ત બ્રહ્માંડ ના દર્શન થયાં.

ભગવાને સુદામા ને અખૂટ સંપત્તિ આપી ત્યારે યમરાજ ને દુઃખ થયું,તેમણે ભગવાન ને કહ્યું-કે-
સુદામા ના નસીબ માં દારિદ્રય નો યોગ છે,તેના ભાગ્ય માં શ્રીક્ષય લખ્યું છે. આપે સુદામા ને આટલું
ઐશ્વર્ય આપ્યું તે યોગ્ય નથી.તેથી કર્મ મર્યાદા રહેશે નહિ. અમે કર્મ પ્રમાણે સુખ-દુઃખ આપીએ છીએ.
ત્યારે પ્રભુ એ યમરાજા ને કહ્યું કે-હું વેદ ની કર્મ મર્યાદા તોડતો નથી,જે મને જમાડે છે તે સમસ્ત બ્રહ્માંડ ને જમાડે છે,મુઠ્ઠી પૌઆ આપી-સુદામા એ મને જમાડ્યો છે.
જે શ્રીકૃષ્ણ ને જમાડે છે-તે સારા બ્રહ્માંડ ને જમાડે છે. અને તેના નામે એટલું પુણ્ય જમા થાય છે.

યશોદા મા ને શ્રીકૃષ્ણ કહે છે-કે-મા તું મને તૃપ્ત કરતી નથી પણ સમસ્ત બ્રહ્માંડ ને તૃપ્ત કરે છે.

લાલા ના જન્મ થયે હવે એક વર્ષ થવા આવ્યું. હજુ લાલા નો નામકરણ સંસ્કાર થયો નથી.
ગર્ગાચાર્ય યાદવો ના કુલપુરોહિત છે,વસુદેવજીએ ગર્ગાચાર્ય ને બોલાવ્યા અને નંદજી ના ઘેર જઈ
લાલા નું નામ પાડવા કહ્યું. વસુદેવજી ના કહેવાથી ગર્ગાચાર્ય નંદજી ના ઘેર આવ્યા છે.
ગર્ગાચાર્ય જ્યોતિષશાસ્ત્ર માં બહુ નિષ્ણાત છે. નંદબાબાએ તેમનું સ્વાગત કર્યું છે.
અને કહે છે-
મહારાજ વૃદ્ધાવસ્થામાં મારે ત્યાં દીકરો આવ્યો છે,બધા તેને –લાલો-લાલો કહે છે,તેનું નામકરણ કર્યું નથી,
આપ જ્યોતિષશાસ્ત્ર માં કુશળ છો તો તેનું નામ શું પાડવું તે કહો.

ડોંગરેજી મહારાજ ની કથા પર આધારિત
      PREVIOUS PAGE
     NEXT PAGE
   INDEX PAGE