Jul 24, 2013

ભાગવત રહસ્ય -૩૬૫

ડોંગરેજી મહારાજ ની કથા પર આધારિત
      PREVIOUS PAGE
     NEXT PAGE
સ્કંધ-૧૦ (પૂર્વાર્ધ)-૮૮

એક વાર ભજન માં આનંદ મળી જાય પછી સંસાર નો આનંદ ફિક્કો લાગે છે.
આ જીવ ને ભજન માં આનંદ મળતો નથી એટલે બીજે આનંદ ખોળવા જાય છે.

પતિ શાંડિલ્યઋષિ ભોજન કરતા નથી એટલે પત્ની પૂર્ણમાસી પણ ફળાહાર થી ચલાવી લે છે.
ઘરમાં એક છોકરો મધુમંગલ છે, હજુ નાનો છે,જનોઈ આપી નથી એટલે નંદબાબા ને ઘેર જમવા જાય છે.
યશોદાજી વૈશ્ય છે એટલે શાંડિલ્યઋષિ ને કહેલું કે જનોઈ ના આપો ત્યાં સુધી મધુમંગલ ભલે અમારે ત્યાં જમે.ગોરનો દીકરો એટલે યશોદા મા મધુમંગલ ને માનથી અને પ્રેમ થી જમાડે છે.

પણ આજે મધુમંગલ દોડતો ઘેર આવ્યો અને મા ને કહે છે કે-મા,આજે લાલા ને આપણા ઘરનું ખાવું છે.મા,જે બનાવ્યું હોય તે મને આપ.

પૂર્ણમાસી કહે છે-બેટા તારા પિતા રોજ ઉપવાસ કરે છે,ઘરમાં રસોઈ બનતી નથી,ઘરમાં કંઈ નથી.
પૂર્ણમાસી ને દુઃખ થયું છે, આજે કનૈયો ખાવા માગે છે અને ગરીબ બ્રાહ્મણી ના ઘરમાં કંઈ નથી.
કનૈયા માટે હું શું આપું ? અતિ તપસ્વી બ્રાહ્મણ ના ઘરમાં કોઈ વસ્તુ નો સંગ્રહ નથી (અપરિગ્રહતા).
આજે ઘરમાં કાંઇ પણ ખાવાનું નથી જે લાલાને અપાય.

પૂર્ણમાસી વિચારે છે-કે-યશોદાજી તો રોજ મને પૂછે છે કે -મને કોઈ સેવા બતાવો.તો કાલે થોડો માવો
માગી લાવી ને મીઠાઈ બનાવીશ અને તે આપીશ.
ત્યારે મધુમંગલ કહે છે –કે-મા,કાલે નહિ પણ આજે જ મને કાંઇક આપ.બધા મિત્રો મારી મશ્કરી કરે છે.
કે આ કંઈ લાવ્યો નથી,અને લાલાએ આજે જ માગ્યું છે.તો -કશું પણ લીધા વગર હું પાછો કેમ જાઉં ?

પૂર્ણમાસી ઘરમાં શોધે છે,તો ઘરમાં માત્ર થોડી છાશ છે.છાશ ખાટી હશે તો લાલાને પીતાં ત્રાસ થશે,
એમ સમજી છાશ માં થોડી ખાંડ નાંખી વઘાર કરી છાશ ની મટકી ભરી આપી.
લાલા માટે ખાટી છાશ ભરી આપતાં પૂર્ણમાસીની આંખ માં આંસુ આવ્યા છે. વિચારે છે-કે-
“પણ હું શું કરું ?મારા ઘરમાં બીજું કશું નથી.”
મધુમંગલ ને કહે છે –કે-લાલા ને કહેજે કે –આજે ઘરમાં આ છાશ સિવાય કશું નથી એટલે મા એ
રોતાં રોતાં આ છાશ આપી છે,છાશ થોડી ખાટી છે પણ તેને પીતાં ત્રાસ ના થાય એટલે થોડી ખાંડ નાંખી છે, પણ કાલે ગમે તે રીતે મીઠાઈ બનાવી  આવીશ.

લાલા માટે ખાટી છાશ આપતાં, પૂર્ણમાસી ના દિલમાં ડૂમો ભરાઈ આવ્યો છે.

પરમાત્મા શ્રીકૃષ્ણ ને કોઈ વસ્તુ ની ભૂખ નથી. એમને તો પ્રેમ ની ભૂખ છે.
પરમાત્મા કદી જોતા નથી કે –જીવ મારા માટે શું લાવ્યો છે ?
પણ એ જુએ છે કે કેવા ભાવથી લાવ્યો છે. કેવા પ્રેમ થી લાવ્યો છે.

વસ્તુ ને જુએ તે જીવ અને કેવળ ભાવ ને જુએ તે ઈશ્વર.

મધુમંગલ લાલા ને માટે છાશ લઈને, લાલા પાસે આવ્યો છે.

ડોંગરેજી મહારાજ ની કથા પર આધારિત
      PREVIOUS PAGE
     NEXT PAGE
   INDEX PAGE